(1893) De l'aldea al cielu
¡Qué majos y qué contentos
Pasan los días n'aldea
En casina que dorea
El sol pe los cuatro vientos!
¡Y qué feliz y dichosu
E quien, escasu de apurios,
Entre tan gallardos murios
Vive de nada envidiosu!
Pe la mañana cantar
En el alloru vecín
Oise al pardu veranín
Que nos vien á dispertar.
Vese'l solecín de Mayu
Dexar caer generosu
Per entre 'l nozal frondosu
De sos llapadas el rayu.
Llora'l cucu so desgracia,
Lladra 'l pedru 'n el murau
Y el cochu muy enoxau
Pide á gritos la esllabancia.
El pollu en sos gorgolitos
Jaz a la polla una mueca,
Mientras la gallina llueca
Clo, clo, yos diz á sos pitos.
Bierra'l xatrín en la corte
Barruntando la toñada
Y el gatu so la roñada
Da a sos barbas maju porte.
La reciella xuguetona
A morru y en faldereta
Rebizca so la porreta
Esperando la borona.
Mientras l'hombre va á mecer
La llechi, que jaz bulleru,
Arrima'l jueu el pucheru
La trajinera muyer.
Y, depués qu'en la tayuela
Llenaren todos la panza,
Unos van pa la llabranza
Los otros van pa l'iscuela.
Y así, sin malditu'l duelu,
Vive allí la xente ispida,
Esperando l'otra vida
Pa dir á vivir al cielu.